Yangi sonlar koʻpaygan sari saltanatda shovqin ham koʻpaydi. Yetti oltining oldiga turib olardi, sakkiz esa uchning ustiga chiqib ketardi. Baʼzi musbatlar chap tomonga oʻtib, manfiylar bilan aralashib ketardi.
— Kim qayerda turishini bilmay qoldim! — dedi qirol va jahl bilan uzun tayoqini koʻtardi. Sonlar qoʻrqib, bir joyga toʻplanishdi.
Ammo qirolning rahmi keldi. U tayoqni urish oʻrniga… yerga yotqizdi. Keyin tayoqqa teng oraliqlarda chiziqchalar chizdi va farmon chiqardi:
— Har bir chiziqcha — bitta va faqat bitta sonning joyi. Kim katta boʻlsa, oʻngroqda turadi.
Sonlar darhol oʻz joylariga yugurdi. Oʻrtada — Qirol Noʻl. Oʻngda: 1, 2, 3, 4… Chapda: −1, −2, −3, −4… Shu kundan boshlab tayoq sonlar oʻqi deb ataldi. Endi kim kattaligini bahslashish shart emas edi: oʻngroqdagi doim katta. Minusjon hatto kashf qildi: «−5 mendan kichik ekan — u chaproqda!»
Keyin parad boʻldi. Qirol hammani yaxshiroq koʻrish uchun sonlarni ikki safga ajratdi. Ikkiga qoldiqsiz boʻlinadiganlar — juft askarlar, koʻk qalpoqda. Boʻlinmaydiganlar — toq askarlar, qizil qalpoqda. Serjant Ikki baqirdi:
— Juft-juft safga turinglar!
Toq askarlar bir-biriga qarashdi:
— Bizda juft yoʻq — biz toqmiz!
Parad tartibsizlikka aylandi. Shunda juft askarlar shikoyat qilishdi: «Qirolning ikki qanotida — Birjon bilan Minusjon — ikkalasi ham toq. Bu adolatdanmi?»
Qirol oʻylab turdi-da, eʼlon qildi:
— Men ham juftman!
— Kim bilan? — soʻradi kimdir.
— Oʻzim bilan: 0 + 0! Ikkiga boʻlsam ham — 0 ÷ 2 = 0, qoldiq yoʻq.
Juftlar xursand boʻlishdi, toqlar ham koʻndi: qirol baribir oʻrtada, hammaga bir xil yaqin edi. Ammo bu hali holva edi. Sonlar oʻz joylariga qarab, birin-ketin norozilanishni boshlashdi:
— Joyimiz tor! Har birimizga atigi bitta chiziqcha. Chiziqchalar orasidagi boʻsh yerlar kimniki?
Sonlarni toʻgʻri chiziqda tasvirlash gʻoyasini birinchilardan boʻlib ingliz matematigi Jon Uollis 1685-yilda yozgan — atigi 340 yil oldin.
Nol — juft son. Juft son 2 ga qoldiqsiz boʻlinadi, 0 esa 2 × 0 ga teng. Sonlar oʻqida juft va toq sonlar navbatma-navbat keladi: …, −2, −1, 0, 1, 2, …
Keyingi qismda: sonlar chiziqchalar orasidagi boʻsh yerlarni talab qiladi — va bu bozor hech qachon yopilmaydi.